Aliaj Esperantaj proverboj

El Vikicitaro
Iri al: navigado, serĉi

Marjorie-Boulton- aj[redakti]

Marjorie Boulton kun ŝia talento pri rimo kaj sonoj sed superĉio ŝia humanismo kreis multajn trafegajn proverbojn, jen selekto:

  • Lernado era,era,era : kaj vi iam estos klera.
  • Malforta kandelo venas : mallumo jam ne tute plenas.
  • Kiu tro certas pri sia vero, kreas inferon sur la tero.
  • Timigu min, kaj mi obeos honte ; konvinku min, kaj mi obeos volonte.
  • Ke knabo ŝtelis prunon, ne nigrigos la sunon.
  • Ĉion beligas arda amo ; hipopotaminon por hiopopotamo.
  • Prudento ektimas, se promesoj senlimas.
  • Ore belas la fazano ; blue belas genciano.
  • Pli bone violetoj al persono, ol orkideoj al tombŝtono.
  • Esploru la kavernon, sed portu lanternon.
  • Kiu neniam estimas, lia spirito ŝlimas.
  • Multaj milonoj iĝas milionoj.
  • Jes, se iel flugus talpoj, ili flugus super Alpoj.
  • Vinoj kolektiĝas en la kelo, kiel volumoj en la libroservo de UEA

Proverboj de Morteza Mirbaghian[redakti]

  • Se eblus fajron per fajro estingi, eblus pacon per batalo atingi.
  • Se katoj zorgus pri vivo de ratoj, potenculoj zorgus pri homaj rajtoj.
  • Leĝoj similas al araneaj retoj, en kiuj kaptiĝas nur insektetoj.
  • Sinjorina peto egalas al dekreto.
  • Lupo plej sovaĝa, estas homo-vizaĝa.
  • Se najtingalo sian langon bridus, sin en la kaĝo de ĉasist' ne vidus.
  • Pli ol kruelaj reĝoj, vundas maljustaj leĝoj.
  • Kiu havas belajn okulojn, freneze amas spegulojn.
  • Amo similas al supo: ju pli varma, des pli ĉarma.
  • Arbo falinta ne havas radikojn, homo falinta ne havas amikojn.
  • Se edzo ne aŭdus kaj edzino ne vidus, dum la tuta kunvivo ili feliĉe ridus.
  • Feliĉo, samkiel virino bela, malofte dumlonge restas fidela.
  • Por eviti kverelojn, edzo fermu orelojn.
  • Ne malĝoju pro kresko de aĝo, se kun tio ankaŭ kreskas saĝo.
  • Se ne estus pro profito, nenie okazus milito.
  • Kiam profito permesas, oni humanecon forgesas.
  • Fajro tuj estingiĝas sen aero, homo velkas sen just' kaj libero.
  • Interbatalo de katoj estas bona por la ratoj.
  • Fermitaj estu buŝoj de saĝuloj, sed malfermitaj iliaj okuloj.
  • Kiu serĉadas fiulon, enrigardu spegulon.
  • Se fiŝo ekaperus el seka rivero, el politikista buŝo aperus vero.
  • En la leĝaj okuloj, ĉiuj estas egaluloj.